మాలతిని నేను. నన్ను నిడదవోలు మాలతి అంటారు. ఇందులో నాచింతనలూ, చింతలూ, సందేహాాలు ఉంటాయి. , కతలూ వెతలూ,

16, అక్టోబర్ 2026, శుక్రవారం

 పరిచయవాక్యాలు

ఇది కేవలం ఈబ్లాగు సరిగా పని చేస్తోందో లేదో చూడడానికి ప్రచురించేను. మీఅభిప్రాయం చెప్పండి. 

ఇది మెరుగు పరచడానికి ఏమీ చేయవచ్చో కూడా చెప్పవచ్చు. 

- ధన్యవాదాలు. మాలతి.

---------------------------

 

ఈ బ్లాగు 2010లో తెరిచేను. ఒక పోస్టు పెట్టేక మళ్లీ తిరిగి చూడలేదు.

ప్రస్తుతం తెలుగు తూలిక బ్లాగు, తూలిక.నెట్ వెబ్ సైటు లేవు. అందుకు ఎవరూ విచారించకపోవచ్చు. నాకు మాత్రం ముఖ్యంగా బ్లాగు లేకపోవడం కొరతగా ఉంది. కథలకోసం వ్యాసాలకోసం కాదు.

 

తెలుగుతూలిక ఉన్నప్పుడు నా సందేహాలకి సమాధానాలూ నావ్యాసాలలో తప్పులు తెలిసేవి. పండితులు, విషయపరిజ్ఞానం గలవారిమూలంగా సమాధానాలు దొరికేవి తెలిసేవి. ఒప్పులు తెలిసేవి.

ఇప్పుడు ఆ అవకాశం లేకుండా పోయింది. అంచేత ఈ బ్లాగుకి వచ్చేను. ఎలా సాగుతుందో చూడాలి.

 

ప్రస్తుతానికి సాంకేతికంగురించి ఒకమాట చెప్తాను. నేను 40 ఏళ్లగా వాడుతున్నాను కంప్యూటరు. టవర్ రోజులనించి అరచేతిలో అమరిన ఐఫోనువరకూ. ముంజేతి వాచీలు కూడా వచ్చేయి కానీ నేను వాటిజోలికి పోవడంలేదు.

 ఇంతకీ కంప్యూటరులో చిన్న చిన్న చిరాకులొచ్చినప్పుడు అది అమ్మినవారి సపోర్టువారిని పిలిచేదాన్ని. అనతికాలంలో నాపాటి తెలిసినవారు కూడా అక్కడ లేరని తెలిసింది. మన పూజలలో అలవాటుగా పద్ధతిప్రకారం చేసేవి ఉంటాయి చూడండి పత్రం సమర్పయామి, పుష్పం సమర్పయామి అని. అలాగే ఈ consumer support కూడాను. unplug, plug in, restart, reboot … ఇలా చెప్పుకుంటూ పోతారు ఆ సపోర్టర్లు. అవన్నీ నేను చేసేను అని చెప్పినా సరే మళ్లీ మొదలుపెట్టాలి.

ఇప్పుడు తెలిసింది Microsoft Surface 3 battery ఆరిపోతే మళ్లీ మరొక బేటరీ పెట్టలేరు ఆకంపెనీవారు కూడా. సరే పవర్ కార్డుతో వాడుతున్నాను. ఇప్పుడు మరికొన్ని బాధలు కూడా వచ్చేక, మరొక కంప్యూటరు కొందాం అనుకుని చూసేను.

అందులో ఉన్న ఫీచర్సు చూస్తే కళ్లు తిరిగేయి. AI, Gemini, Co-pilot, ... ఇంకా ఏవో నాకు అవేమిటో కూడా తెలీడంలేదు. తెలిసిందల్లా ఒకటే, నేను నేను కాకుండా పోయేను. ఆ యంత్రమే చేసేస్తుంది నేను రాయవలసింది, రాయదలుచుకున్నదీ అంతా. నా సంతకం కూడా అదే పెట్టేస్తుందనుకుంటాను.

ఆలోచిస్తుంటే అనిపించింది. 

మనిషి యంత్రం తయారు చేసేడు. యంత్రం మనిషిని యాంత్రికం చేసింది. 

వివరాలు చెప్తే మీకు విసుగు కలిగించవచ్చు కనక ఇక్కడితో ఆపుతాను.

శలవు

- నిడదవోలు మాలతి.

 

 

కామెంట్‌లు లేవు:

కామెంట్‌ను పోస్ట్ చేయండి

వీలయినంతవరకూ తెలుగులో వ్రాయగలరు. ప్రస్తుతం ఈబ్లాగు మేనేజి చేయడం నాకు సరిగా తెలియడంలేదు. అందుచేత, చూచినవారు ఏదో ఒకమాట, కనీసం మీపేరు, వ్యాఖ్యలలో పెట్టవలసిందిగా నా మనవి. కొన్ని కనిపించేక ఈ మనవి తొలగించేస్తాను. - ధన్యవాదాలు.